Հռոմ․ Խաչանովը հաղթեց մրցաշարի սենսացիան ապահոված թենիսիստին ու քառորդ եզրափակիչում է (տեսանյութ)

Հռոմում ընթացող «Մասթերս» շարքի մրցաշարի 1/8 եզրափակիչում Ռուսաստանը ներկայացնող հայ թենիսիստ Կարեն Խաչանովը մրցում էր Խորվաթիան ներկայացնող Դինո Պրիժմիչի հետ ու հաղթեց 2։0 հաշվով։ Խորվաթ թենիսիստը դարձել էր մրցաշարի սենսացիան՝ պայքարից դուրս թողնելով Մարտոն Ֆուկովիչին, Նովակ Ջոկովիչին ու Ուգո Հումբերտին։ 

Խաչանով-Պրիժմիչ մրցախաղը տևեց 1 ժամ 54 րոպե։ 1-ին սեթում Կարենը խնդիրներ չունեցավ և ջախջախիչ առավելության հասավ 6։1 հաշվով։ 2-րդ սեթում աշխարհի 15-րդ ռակետը ամեն ինչ որոշեց թայ-բրեյքում՝ 7։2։

Մրցախաղի ընթացքում հայ թենիսիստը կատարեց 7 էյս մրցակցի 1-ի դիմաց, փոխարենը կրկնակի սխալների քանակով «առավելության հասավ»՝ 3։2։

Այսպիսով, Խաչանովը դուրս եկավ քառորդ եզրափակիչ, որտեղ հարաբերությունները կպարզի աշխարհի 25-րդ ռակետ, նորվեգացի Կասպեր Ռուդի հետ։ Այդ հանդիպումը կկայանա վաղը։