Խաչանովը դուրս է եկել US Open-ի կիսաեզրափակիչ
Ռուսաստանը ներկայացնող հայ թենիսիստ Կարեն Խաչանովը հաղթանակ է տարել ԱՄՆ բաց առաջնության՝ US Open-2026-ի քառորդ եզրափակիչում։
Աշխարհի 50-րդ ռակետ Խաչանովը մրցել է Բելգիայի ներկայացուցիչ Ալեքսանդր Բլոքսի հետ, որը համաշխարհային վարկանիշային աղյուսակում զբաղեցնում է 34-րդ տեղը։ Խաչանովը հաղթել է մեկնարկային երկու սեթերում՝ 6:2, 7:5 հաշվով։ Երրորդ սեթում, երբ հաշիվը 3:2 էր հօգուտ Խաչանովի, Բլոքսը չի կարողացել շարունակել հանդիպումը՝ ավելի վաղ ստացած ազդրի վնասվածքի պատճառով։ Թենիսիստները կորտում անցկացրել են 1 ժամ 33 րոպե։
«Մաղթում եմ նրան շուտափույթ ապաքինում։ Տեսնում էի, որ ամբողջ մարմնով տառապում է։ Ես շատ լավ էի պատրաստվել այս հանդիպմանը, և ինձ համար հեշտ չէր, քանի որ, մի կողմից, զգում էի, որ հենց սկզբից գերիշխում եմ, իսկ մյուս կողմից՝ հասկանում էի, որ նա աստիճանաբար ավելի ու ավելի է կորցնում ուժերը։ Ուզում էի զսպել էմոցիաներս, բայց ստեղծված իրավիճակի պատճառով փորձում էի չբղավել։ Հակասական զգացողություն էր»,- Խաչանովի խոսքերն է մեջբերում ATP-ի մամուլի ծառայությունը։
Խաչանովը կարիերայում երրորդ անգամ դուրս է եկել «Մեծ սաղավարտի» մրցաշարի կիսաեզրափակիչ։ Նա նախկինում այս փուլին հասել էր US Open-2022-ում և Australian Open-2023-ում։
Մրցաշարի կիսաեզրափակիչում ռուսաստանցի թենիսիստը կմրցի աշխարհի երկրորդ ռակետ, Գերմանիայի ներկայացուցիչ Ալեքսանդր Զվերևի հետ։
ԱՄՆ բաց առաջնությունը Նյու Յորքում կավարտվի սեպտեմբերի 13-ին։ Մրցաշարի ընդհանուր մրցանակային ֆոնդը ռեկորդային 108 մլն դոլար է։ Մրցաշարի չեմպիոնները կստանան 5,5-ական մլն դոլար։
