Մ17 ԵԱ․ Վահե Հովեյանը՝ չեմպիոն, Զավեն Մեժլումյանը՝ փոխչեմպիոն, Ավետիսյանն ու Եղիազարյանը՝ բրոնզե մեդալակիր

Բուլղարիայի Սամոկով քաղաքում ընթացող հունահռոմեական ոճի ըմբշամարտի Եվրոպայի Մ17 առաջնությունում Հայաստանի 4 ներկայացուցիչ մեդալ է նվաճել։

80 կգ քաշային Վահե Հովեյանը եզրափակիչում 34 վայրկյանի ընթացքում հաղթել է Հունգարիայի ներկայացուցիչին՝ հռչակվելով Եվրոպայի չեմպիոն։

65 կգ քաշային Զավեն Մեժլումյանը եզրափակիչում 3։6 հաշվով զիջել է Ասլան Ջուևին՝ նվաճելով արծաթե մեդալ։

55 կգ քաշային Գեղամ Եղիազարյանն ու 48 կգ քաշային Արարատ Ավետիսյանն էլ դարձել են բրոնզե մեդալակիր՝ հաղթելով համապատասխանաբար Հունգարիայի ու Ուկրաինայի ներկայացուցիչներին։

Այսօր մրցագորգ դուրս եկած 45 կգ քաշային Վազգեն Վարդանյանը, 60 կգ քաշային Սամվել Տոնոյանը կանցկացնեն սփոփիչ գոտեմարտ, 71 կգ քաշային Ջանես Նազարյանն ու 92 կգ քաշային Ալեքսան Շալջյանը կպայքարեն ոսկու համար։