ԵԱ․ Մանվել Խնձրցյանը ջախջախեց Ազամատ Տուսկաևին ու նվաճեց բրոնզե մեդալ

Տիրանայում ընթացող ազատ ոճի ըմբշամարտի Եվրոպայի առաջնության 57 կգ քաշային կարգում Հայաստանը ներկայացնող Մանվել Խնձրցյանը բրոնզե մեդալի համար գոտեմարտում էր Սերբիան ներկայացնող Ազամատ Տուսկաևի հետ ու 18։6 հաշվով ջախջախելով վերջինիս՝ նվաճեց բրոնզե մեդալ։

Խնձրցյանը պայքարը սկսել էր որակավորման փուլից, որտեղ 12։6 հաշվով հաղթեց գերմանացի Հորստ Լեհրին։ Քառորդ եզրափակիչում Խնձրցյանը 12։1 հաշվով ջախջախեց ռումինացի Ռամզան Կովաչին, իսկ կիսաեզրափակիչում 0։5 հաշվով զիջեց ռուս Մուսա Մեխտիխանովին։

Այսօր բրոնզե մեդալի համար կպայքարեն նաև 65 կգ քաշային Վազգեն Թևանյանն ու 79 կգ քաշային Հրայր Ալիխանյանը։ Վաղը «բրոնզե» եզրափակիչում կտեսնենք նաև 61 կգ քաշային Արսեն Հարությունյանին։

92 կգ քաշային Մուշեղ Մկրտչյանն ու 125 կգ քաշային Խաչատուր Խաչատրյանը սփոփիչ գոտեմարտեր կանցկացնեն։

Պայքարը լքել են 70 կգ քաշային Դավիթ Մարգարյանը, 74 կգ քաշային Նարեկ Հարությունյանը։