ԵԱ․ Սլավիկ Գալստյանը՝ բրոնզե մեդալակիր

Ալբանիայի Տիրանա քաղաքում ընթացող հունահռոմեական ոճի ըմբշամարտի Եվրոպայի առաջնության 67 կգ քաշային կարգում Հայաստանի ներկայացուցիչ Սլավիկ Գալստյանը նվաճեց բրոնզե մեդալ։

Հայ ըմբիշը մեդալի համար պայքարում հաղթեց ուկրաինացի Օլեքսանդր Հրուշինին՝ 5։3 հաշվով։

Գալստյանը մեկնարկել էր 1/8 եզրափակիչից, որտեղ 9։0 հաշվով ջախջախել էր Շվեյցարիան ներկայացնող Անդրեաս Վետշչին։ Քառորդ եզրափակիչում հայ ըմբիշը զիջեց թուրք Մուրատ Ֆիրատին (0։5)։ Սփոփիչ գոտետմարտում Սլավիկը առավելության հասավ Յանիս Նիֆրիի նկատմամբ՝ 5։2 հաշվով։

Ավելի վաղ, հունահռոմեական ոճում չեմպիոն էր հռչակվել 77 կգ քաշային Մալխաս Ամոյանը, 60 կգ քաշային Սուրեն Աղաջանյանը դարձել էր փոխչեմպիոն, իսկ 63 կգ քաշային Կարեն Ասլանյանն արժանացել էր բրոնզե մեդալի։