Ռեալը պարտվեց Մալյորկային

Իսպանիայի առաջնության 30-րդ տուրում Մադրիդ «Ռեալը» հյուրընկալվել էր «Մալյորկային» ու զիջեց 1։2 հաշվով։

41-րդ րոպեին Մանու Մորլանեսը բացեց հանդիպման հաշիվը։ Խաղավարտից 2 րոպե առաջ Էդեր Միլիտաոն վերականգնեց հաշվի հավասարությունը, բայց հիմնական ժամանակին ավելացրած 1-ին րոպեին Վեդատ Մուրիքին խփեց տանտերերի հաղթական գոլը։

Այս հաղթանակի շնորհիվ «Մալյորկան» վաստակեց 31 միավոր ու լքեց վտանգավոր գոտին՝ բարձրանալով 17-րդ հորիզոնական։ «Ռեալը» 69 միավորով 2-րդն է ու 4 միավոր զիջում է առաջատար «Բարսելոնային», որից 1 խաղ ավել է անցկացրել։