Ման․ Սիթիի երկրպագուների ավտոբուսը հրդեհվել է Արսենալի դեմ եզրափակիչից առաջ
«Մանչեսթեր Սիթիի» երկրպագուների ավտոբուսը հրդեհվել է Անգլիայի լիգայի գավաթի խաղարկության եզրափակիչ՝ «Արսենալի» դեմ խաղի ճանապարհին:
Ինչպես հայտնում է Manchester Evening News-ը, ավտոբուսի հրդեհը տեղի է ունեցել Վեսթ Միդլենդսի վճարովի մայրուղու վրա, ինչի պատճառով ճանապարհի այդ հատվածը փակվել է:
«Ամեն ինչ սկսվեց նրանից, որ մեր ավտոբուսը սկսեց ծխալ վճարման կետի մոտ: Այն անցնելուց հետո մենք զգալիորեն դանդաղեցրինք ընթացքը: Մեզնից ոչ ոք գլխի չէր ընկնում, թե ինչ է կատարվում: Վարորդը մոտեցավ ճամփեզրին և մենք ընթացանք ևս հինգ րոպե` մինչև կանգ առանք:
Կանգնելուց հետո ավտոբուսից ծխի մեծ սյուն բարձրացավ և մենք բոլորս դուրս եկանք: Շարժիչը շարունակում էր աշխատել, այն բռնկվեց: Այնուհետև կրակը դանդաղորեն տարածվեց ամբողջ ավտոբուսով: Ժամանած հրշեջ ջոկատը կարգավորեց իրավիճակը»,- պատմել է ավտոբուսում գտնվող երկրպագուներից մեկը:
Ridleys Coaches ընկերության ներկայացուցչի խոսքով, որին պատկանում էր տրանսպորտային միջոցը, վարորդն ու բոլոր ուղևորները տարհանվել են և միջադեպի հետևանքով ոչ ոք չի տուժել: «Մանչեսթեր Սիթիի» երկրպագուները կարողացել են մարզադաշտ հասնել այլ ավտոբուսներով:
