Ինտեր-Յուվենտուս հանդիպման գլխավոր մրցավարին սպառնացել են սպանել․ Նա դիմել է ոստիկանություն

Իտալիայի առաջնության 25-րդ տուրի «Ինտեր»-«Յուվենտուս» (3։2) հանդիպման գլխավոր մրցավար Ֆեդերիկո Լա Պեննան դիմել է ոստիկանություն՝ իր հասցեին հնչած սպառնալիքների պատճառով։

Լա Պեննան առաջին խաղակեսի 42-րդ րոպեին, «Ինտերի» պաշտպան Ալեսանդրո Բաստոնիի սիմուլյացիայից հետո, թուրինյան ակումբի պաշտպան Պիեր Կալուլուին ցույց տալով 2-րդ դեղին քարտը՝ հեռացրել էր խաղադաշտից։

Հանդիպումից հետո մրցավարի հասցեին սոցիալական ցանցերում հնչել են վիրավորանքների, ինչպես նաև՝ մահվան սպառնալիքներ։ Ստեղծված իրավիճակում Լա Պեննան դիմել է Հռոմի ոստիկանություն, որը սկսել է հետաքննություն։

Ավելի վաղ, հայտնի էր դարձել, որ սպառնալիքներ են հնչում նաև Բաստոնիի ու կնոջ՝ Կամիլա Բրեշիանիի հասցեին։