Կցանկանայի վերահսկել ամեն ինչ, բայց հանդերձարանում առանձնասենյակ չունեմ․ Արբելոան՝ հանդերձարանում տեղի ունեցած ծեծկռտուքի մասին

Մադրիդի «Ռեալի» գլխավոր մարզիչ Ալվարո Արբելոան անդրադարձել է թիմի հանդերձարանում տեղի ունեցած միջադեպին։ Մասնավորապես, նա պատասխանել է այն հարցին, թե արդյոք կարո՞ղ էր կանխել կիսապաշտպաններ Ֆեդերիկո Վալվերդեի և Օրելիեն Չուամենիի միջև ծագած ծեկռտուքը, որը տեղի էր ունեցել հինգշաբթի՝ մայիսի 7-ի մարզումից հետո։

««Ռեալի» հանդերձարանում ես սեփական առանձնասենյակ չունեմ։ Կցանկանայի պատասխանատվություն կրել տեղի ունեցած ամեն ինչի համար և վերահսկել ամենը։ Եթե այս իրավիճակի հետևանքով կարծիք է ձևավորվել, որ մարզիչը պետք է կանգնեցներ այդ ամենը, ապա ես ընդունում եմ դա։

Սա տհաճ իրավիճակ է, որը պետք է օրինակ ծառայի բոլորի համար։ Եկեք առաջ շարժվենք, դասեր քաղենք կատարվածից և չմոռանանք, որ վաղը կայանալու է «Բարսելոնա» — «Ռեալ Մադրիդ» հանդիպումը»,- մամուլի ասուլիսի ժամանակ նշել է Արբելոան։

Հիշեցնենք, որ բախման հետևանքով ուրուգվայցի ֆուտբոլիստը գլխի պատռվածք էր ստացել և տեղափոխվել հիվանդանոց, իսկ ակումբում որոշել էին յուրաքանչյուր ֆուտբոլիստի նկատմամբ կիրառել դրամական տուգանք՝ 500 հազար եվրոյի չափով։