Ես չեմ ուզում կանգ առնել․ 40-ամյա Էդին Ջեկոն՝ Շալկեի հետ Բունդեսլիգան նվաճելուց հետո խոսել է իր ապագայի մասին

«Շալկե-04»-ի բոսնիացի հարձակվող Էդին Ջեկոն, թիմի հետ Բունդեսլիգայի ուղեգիր նվաճելուց հետո, խոսել է իր ապագայի մասին։ Ֆուտբոլիստը 40 տարեկան է, նա «Շալկեի» կազմը համալրել է հունվարին։

«Ես ճիշտ որոշում կայացրեցի՝ տեղափոխվելով «Շալկե»։ Նվաճել Բունդեսլիգայի ուղեգիր, որից հետո Բոսնիա և Հերցեգովինայի հավաքականի կազմում խաղալ աշխարհի առաջնությունում՝ պարզապես երազանք է։ Հնարավոր է առանց «Շալկեի» ես չկարողանայի հասնել դրան։

Հիմա մենք թիմի հետ վայելում ենք պահը, տոնում ենք։ Ես դեռ բավական ժամանակ ունեմ ապագայի մասին մտածելու համար։ Երբ տեսնում ես այս ամենը, հասկանում ես, թե հանուն ինչի ես ֆուտբոլ խաղում։ Ես չեմ ուզում կանգ առնել, ինձ լավ եմ զգում։ Բայց ես արդեն 40 տարեկան եմ, տեսնենք՝ ինչպես ինձ կզգամ աշխարհի առաջնությունից հետո։ Իսկ հետո ամեն ինչ կքննարկենք ակումբի հետ», — Ջեկոյի խոսքերը մեջբերում է լրագրող Ֆլորիան Պլետենբերգը X-ի իր էջում՝ հղում անելով Sky Sport-ին։

«Շալկեի» կազմում անցկացնելով 9 հանդիպում՝ Ջեկոն դարձել է 6 գոլի ու 3 գոլային փոխանցման հեղինակ։