Վազգեն Թևանյանը հաղթեց Ադրբեջանի ներկայացուցչին ու նվաճեց բրոնզե մեդալ (տեսանյութ)

Տիրանայում ընթացող ազատ ոճի ըմբշամարտի Եվրոպայի առաջնության 65 կգ քաշային կարգում Հայաստանը ներկայացնող Վազգեն Թևանյանը բրոնզե մեդալի համար գոտեմարտում էր Ադրբեջան ներկայացնող Ռաշիդ Բաբաձադեի հետ ու հաղթեց 7։0 հաշվով։

Թևանյանը մեկնարկել էր որակավորման փուլում, որտեղ 5։2 հաշվով հաղթել էր Ֆրանսիան ներկայացնող Խամզատ Արսամերզուևին։ Քառորդ եզրափակիչում հայ ըմբիշը առավելության էր հասել Շամիլ Մամեդովի նկատմամբ՝ 2։1 հաշվով, իսկ կիսաեզրափակիչում 3։3 հաշվով զիջել էր Բաշիր Մագոմեդովին։

Այսօր բրոնզե մեդալ է նվաճել 57 կգ քաշային Մանվել Խնձրցյանը։ Նույն հարգի մեդալի համար կպայքարի նաև 79 կգ քաշային Հրայր Ալիխանյանը։

Վաղը «բրոնզե» եզրափակիչում կտեսնենք 61 կգ քաշային Արսեն Հարությունյանին, իսկ 92 կգ քաշային Մուշեղ Մկրտչյանն ու 125 կգ քաշային Խաչատուր Խաչատրյանը սփոփիչ գոտեմարտեր կանցկացնեն։

Պայքարը լքել են 70 կգ քաշային Դավիթ Մարգարյանը, 74 կգ քաշային Նարեկ Հարությունյանը։