Սկանդալ Լա Լիգայում. VAR-ը փրկել է Ժերար Մարտինին․ CTA-ի որոշմամբ պաշտպանը պետք է հեռացվեր

Իսպանիայի ֆուտբոլի ֆեդերացիայի (RFEF) մրցավարների տեխնիկական կոմիտեն (CTA) խոստովանել է, որ մրցավար Մատեո Բուսկետս Ֆերերը Լա Լիգայի 30-րդ տուրի «Ատլետիկո Մադրիդ»-«Բարսելոնա» (1:2) հանդիպման ժամանակ սխալվել է՝ չեղարկելով «կապտանռնագույնների» պաշտպան Ժերար Մարտինի հեռացումը:

Հանդիպման 46-րդ րոպեին կատալոնական ակումբի խաղացողը ոտքով հարվածել էր Տիագո Ալմադայի ոտքին՝ նախքան այդ հպվելով գնդակին: Հանդիպման գլխավոր մրցավարը Մարտինին ցույց էր տվել կարմիր քարտ, սակայն VAR-ի մրցավարների խորհրդով կրկնապատկերը դիտելուց հետո այն փոխարինել էր դեղին քարտով:

«Դա կանոնների լուրջ խախտում էր՝ անկախ նրանից, թե ով է առաջինը դիպչել գնդակին: Ճիշտ կարգապահական պատիժը պետք է լիներ կարմիր քարտը:

VAR-ը չպետք է միջամտեր, քանի որ գլխավոր մրցավարի կողմից կայացված որոշումը ճիշտ էր: VAR-ի՝ դրվագը վերանայելու հանձնարարականը հանգեցրել է գործողության սխալ փոփոխության, որը դաշտում ճիշտ էր գնահատվել: Մրցավարը պետք է հավատարիմ մնար իր նախնական որոշմանը»,- CTA-ի որոշումն է մեջբերում AS-ը: