Մայամի. Կարեն Խաչանովը կհանդիպի կարիերայի գլխավոր մրցակցին

Աշխարհի 15-րդ ռակետ Կարեն Խաչանովն իմացել է Մայամիի «Մասթերս» մրցաշարում իր առաջին մրցակցի անունը: Ռուսաստանը ներկայացնող հայ թենիսիստը մրցելու է Ռոբերտո Բաուտիստա Ագուտի հետ:

Խաչանովը կարիերայի ընթացքում ամենաշատը մրցել է հենց իսպանացու հետ. անցկացրած 11 խաղերում Կարենը հաղթել է 5 անգամ, իսկ Բաուտիստա Ագուտը՝ 6:

Մայամիում Խաչանովն իր բարձր վարկանիշի շնորհիվ պայքարը մեկնարկում է երկրորդ շրջանից: Իսկ ահա աշխարհի 89-րդ ռակետ իսպանացին առաջին շրջանում հանդիպել է ավստրալացի Ջեյմս Դաքվորթին և հաղթել 7:6, 7:6 հաշվով:

Հայ թենիսիստը երկու անգամ Բաուտիստա Ագուտին պարտվել է «Մեծ սաղավարտի» մրցաշարերում, բայց փոխարենը հաջողության է հասել նրանց միջև կայացած նախորդ երեք հանդիպումներում, որոնցից երկուսը տեղի են ունեցել Մադրիդում:

Բաուտիստա Ագուտ – Խաչանով մրցավեճը նախանշված է այսօր՝ Երևանի ժամանակով 22:30-ին: