Հենրիխ Մխիթարյանը նշում է ծննդյան 37-ամյակը. Ինտերի շնորհավորանքը հայ ֆուտբոլիստին

Հայաստանի ազգային հավաքականի նախկին ավագ, «Ինտերի» կիսապաշտպան Հենրիխ Մխիթարյանն այսօր՝ հունվարի 21-ին, նշում է ծննդյան 37-ամյակը:

Մխիթարյանը Հայաստանի ազգային հավաքականի լավագույն ռմբարկուն է, 12 անգամ դարձել է Հայաստանի լավագույն ֆուտբոլիստ: Նա կարիերան սկսել է Երևանի «Փյունիկում», ապա պաշտպանել է ուկրաինական «Մետալուրգ», «Շախտյոր», գերմանական «Բորուսիա Դորտմունդ», անգլիական «Մանչեսթեր Յունայթեդ», «Արսենալ», իտալական «Ռոմա» ակումբների գույները: 

«Ինտերն» արդեն գրառում է արել պաշտոնական կայքում՝ շնորհավորելով հայ ֆուտբոլիստին:

«Շնորհավոր ծնունդդ, Հենրիխ Մխիթարյան։

«Ներաձուրի»-ի կիսապաշտպանն այսօր դառնում է 37 տարեկան։ 2022 թվականի ամռանը միանալով «Ինտերին»՝ նա տոնում է իր չորրորդ տարին ակումբում՝ շարունակելով ապացուցել, որ թիմի առանցքային խաղացողներից է՝ իր հավասարակշռության, փորձի և բարձր որակի շնորհիվ։

«Ինտերի» գույներով հանդես գալու ընթացքում նա ունեցել է առաջատար դեր՝ նվաճելով Երկրորդ աստղի Սկուդետտոն, ինչպես նաև մեկ Իտալիայի գավաթ և երկու Իտալիայի Սուպերգավաթ՝ թիմի հաջողություններին նպաստելով իր տակտիկական խելամտությամբ և անհատականությամբ։

Այս մրցաշրջանում խաղացողն արդեն անցկացրել է 19 հանդիպում բոլոր մրցաշարերում։

Ակումբը և բոլոր երկրպագուները լավագույն մաղթանքներն են հղում «Ինտերի» կիսապաշտպանին»,- ասվում է ակումբի տարածած հաղորդագրության մեջ։