Բարսելոնայում ծաղրում են Վալվերդեին ու քննարկում Ռեալի հանդերձարանում տիրող իրավիճակը
Մադրիդի «Ռեալի» կիսապաշտպաններ Ֆեդերիկո Վալվերդեի և Օրելիեն Չուամենիի միջև տեղի ունեցած ծեծկռտուքը դարձել է «Բարսելոնայի» ֆուտբոլիստների քննարկման գլխավոր թեման: Ինչպես հայտնում է Mundo Deportivo-ն, Լա Լիգայի 35-րդ տուրի «Էլ Կլասիկոյին» (մայիսի 10) ընդառաջ կատալոնական ակումբի հանդերձարանում ակտիվորեն խոսում են մրցակցի ճամբարում տիրող քաոսի մասին:
Ըստ աղբյուրի՝ տեղեկությունները «Բարսելոնայի» խաղացողներին են հասել երրորդ անձանց միջոցով: Թիմի մեծ մասը համոզված է, որ միջադեպի հիմնական մեղավորը Վալվերդեն է: Կատալոնացիները նշում են, որ ուրուգվայցին հայտնի է իր կոպիտ խաղով և ոչ սպորտային պահվածքով:
Մասնավորապես, «Բարսելոնայի»՝ Իսպանիայի հավաքականի ֆուտբոլիստները հիշեցրել են 2023 թվականի աղմկահարույց դեպքը, երբ Վալվերդեն «Սանտյագո Բեռնաբեուի» ավտոկայանատեղիում հարվածել էր «Վիլյառեալի» պաշտպան Ալեքս Բաենային: Միևնույն ժամանակ, կատալոնական ակումբում փաստում են, որ Չուամենին երբեք աչքի չի ընկել նմանատիպ վարքագծով:
Բացի բուն բախումից, «Բարսելոնայի» հանդերձարանում ծաղրի առարկա է դարձել նաև Վալվերդեի հրապարակած ուղերձը սոցցանցերում: Ֆուտբոլիստները նկատել են, որ ուրուգվայցու տարբերակում կան բազմաթիվ հակասություններ և կոպիտ քերականական սխալներ:
