Երիտասարդների ԱԱ․ Աննա Ամրոյանը հաջողեց պոկումի բոլոր մոտեցումները
Եգիպտոսի Իսմայիլիա քաղաքում ընթացող ծանրամարտի երիտասարդների աշխարհի առաջնության 77 կգ քաշային կանանց պայքարում Հայաստանը ներկայացնող Աննա Ամրոյանը պոկում վարժությունից հետո 5-րդն է։
Հայ մարզուհին հաջողեց բոլոր մոտեցումները՝ ֆիքսելով 100, 104 և 106 կգ կշռող ծանրաձողերը։
Հատկանշական է, որ Ամրոյանը օրեր առաջ Բաթումիում կայացած Եվրոպայի մեծահասակների առաջնության այս վարժությունում 0 էր ստացել, սակայն փոքր ոսկե մեդալ էր նվաճել հրում վարժությունում։
Այս վարժության հաղթողը Յանետ Յուլիսոյնին է՝ 108 կգ արդյունքով։ Յուլիսոյնին Եվրոպայի գործող չեմպիոնն է։
Հրում վարժության առաջին մոտեցման համար Ամրոյանը պատվիրել է 130 կգ, որը ամենաբարձր պատվերն է։ Բաթումիում Ամրոյանը ցույց էր տվել 136 կգ։
Հայաստանի ներկայացուցիչներից պայքարն ավելի վաղ ավարտել էին 65 կգ քաշային Արտուշ Գրիգորյանը, որը 0 էր ստացել հրումում, 71 կգ քաշային Նարեկ Գրիգորյանը ու Հովհաննես Հովհաննիսյանը։
Գրիգորյանը փոքր ոսկե մեդալ էր նվաճել պոկում վարժությունում, սակայն հրումում ստացած վնասվածքի պատճառով մնացել էր առանց երկամարտի արդյունքի, իսկ Հովհաննիսյանը հրում վարժությունում նվաճել էր արծաթե մեդալ՝ երկամարտում զբաղեցնելով 4-րդ տեղը։ 69 կգ քաշային Մերի Միսակյանն էլ զբաղեցրել էր 6-րդ տեղը, իսկ Նարեկ Մկրտչյանն էլ հռչակվել էր աշխարհի փոխչեմպիոն՝ փոքր բրոնզե մեդալ նվաճելով հրում վարժությունում։
Հայաստանի հավաքանի կազմում հանդես կգան նաև 94 կգ քաշային Վալերիկ Մովսիսյանը, 110 կգ քաշային Գրիգոր Ղազարյանը, +110 կգ քաշային Գագիկ Մկրտչյանը: Կանանց պայքարում մրցահարթակ դուրս կգա նաև 86 կգ քաշային Էմմա Պողոսյանը:
