Շնորհակալ ենք. ՀՖՖ-ի խորհրդանշական նվերը Արտակ Գրիգորյանին

Ազգերի լիգայի անցումային փլեյ-օֆֆ փուլի Հայաստան-Վրաստան խաղից առաջ Հայաստանի ֆուտբոլի ֆեդերացիան խորհդանշական նվեր է հանձնել ազգային թիմի նախկին ֆուտբոլիստ Արտակ Գրիգորյանին:

«Շնորհակալ ենք ամեն ինչի համար»,- լուսանկարին կից գրել է ՀՖՖ մամուլի քարտուղարությունը:

Հիշեցնենք՝ 37-ամյա Գրիգորյանը նախորդ տարվա դեկտեմբերին է հայտարարել մարզական կարիերան ավարտելու մասին:

Գրիգորյանը Հայաստանի Բարձրագույն լիգայում 404 խաղ է անցկացրել, այս ցուցանիշով պատմության մեջ երրորդն է: Ընդհանուր առմամբ ակումբային մակարդակում անցկացրել է 494 խաղ, դարձել 24 գոլի և 16 գոլային փոխանցման հեղինակ:

Կիսապաշտպանը մեկական անգամ «Փյունիկի» և «Ուլիսի», չորս անգամ «Ալաշկերտի» հետ դարձել է Հայաստանի չեմպիոն: «Ալաշկերտի» հետ նաև մեկ անգամ դարձել է Հայաստանի գավաթակիր, երկու անգամ` սուպերգավաթակիր: 2020/2021 մրցաշրջանում էլ ճանաչվել է լավագույն ֆուտբոլիստ:

Արտակ Գրիգորյանը նաև հանդես է եկել Հայաստանի ազգաային հավաքականում, մասնակցել 52 հանդիպման, դարձել մեկ գոլի հեղինակ: