Չեմպիոնների լիգա. Երկու խաղերում էլ լավագույնը դարպասապահներն էին

Չեմպիոնների լիգայի քառորդ եզրափակիչի մեկնարկային երկու հանդիպումներում խաղի լավագույն ֆուտբոլիստ են ճանաչվել հյուրերի դարպասապահները:

«Ռեալ Մադրիդ» – «Բավարիա» մրցավեճում (1:2) լավագույնի կոչումը ստացել է 40-ամյա Մանուել Նոյերը: Գերմանացին 9 սեյվ է կատարել՝ իր դարպասին կատարված 10 հարվածներից: Ընթացիկ Չեմպիոնների լիգայում Նոյերը երկրորդ անգամ է ստանում լավագույնի կոչումը. գերմանացին փայլել էր նաև լիգայի փուլի «ՊՍԺ»-ի դեմ արտագնա խաղում, որում «Բավարիան» հաղթել էր 2:1 հաշվով:

«Սպորտինգ» – «Արսենալ» խաղում (0:1) լավագույնը նույնպես հյուրերի դարպասապահն էր՝ Դավիդ Ռայան: Իսպանացու դարպասին կատարվել է 5 հարված, որոնք բոլորը նա չեզոքացրել է: Ռայան այս մրցաշրջանում առաջին անգամ ճանաչվեց խաղի լավագույն ֆուտբոլիստ: