Ես ցնցված եմ տեղի ունեցածից․ ՖԻՖԱ-ի նախագահը՝ Վինիսիուսի հետ կապված միջադեպի մասին

ՖԻՖԱ-ի նախագահ Ջաննի Ինֆանտինոն արձագանքել է Մադրիդի «Ռեալի» հարձակվող Վինիսիուս Ժունիորի շուրջ սկանդալին։ Ավելի վաղ ֆուտբոլիստը հայտնել էր, որ «Բենֆիկայի» վինգեր Ջանլուկա Պրեստիաննին Չեմպիոնների լիգայի անցումային փուլի խաղում իրեն «կապիկ» է անվանել, ինչից հետո հանդիպումը ժամանակավորապես դադարեցվել էր։

«Ես ցնցված և վշտացած էի՝ տեղեկանալով Չեմպիոնների լիգայում Վինիսիուս Ժունիորի նկատմամբ ենթադրյալ ռասիզմի դրսևորման մասին։ Մեր մարզաձևում և հասարակությունում ռասիզմի տեղ չկա․ անհրաժեշտ է, որ բոլոր շահագրգիռ կողմերը միջոցներ ձեռնարկեն և մեղավորներին պատասխանատվության ենթարկեն։
 
Մենք ձգտում ենք ապահովել խաղացողների, պաշտոնյաների և երկրպագուների նկատմամբ հարգանքն ու պաշտպանությունը, ինչպես նաև համապատասխան միջոցների կիրառումը նման միջադեպերի դեպքում։ Ես շնորհակալություն եմ հայտնում մրցավար Ֆրանսուա Լետեքսիեին, ով ակտիվացրեց հակառասիստական արձանագրությունը՝ ձեռքի հատուկ ժեստով կանգնեցնելով խաղը և պարզաբանելով իրավիճակը»,-ասել է Ինֆանտինոն։