Լատվիայի Մ20 հավաքականը՝ Երևանում անցկացված բասկետբոլի Եվրոպայի Բ դիվիզիոնի առաջնության հաղթող
Երևանում ավարտվել է բասկետբոլի Եվրոպայի մինչև 20 տարեկանների Բ դիվիզիոնի առաջնությունը։ Մրցաշարի հաղթողի տիտղոսը նվաճել է Լատվիայի հավաքականը, որը եզրափակիչ խաղում 74։64 հաշվով առավելության է հասել Խորվաթիայի ընտրանու նկատմամբ։
Եզրափակիչ հանդիպումից հետո տեղի ունեցած պարգևատրման արարողության ընթացքում մրցանակակիրներին պարգևները հանձնել են ՀՀ կրթության, գիտության, մշակույթի և սպորտի նախարարի տեղակալ Հասմիկ Ավագյանը և Հայաստանի բասկետբոլի ֆեդերացիայի գլխավոր քարտուղար Արթուր Նազարյանը։
Հայաստանի մինչև 20 տարեկանների հավաքականը հանդես է եկել Փիթ Դոմինգեսի գլխավորությամբ և 21 թիմերի պայքարում զբաղեցրել է 16-րդ հորիզոնականը։ Եվրոպայի երիտասարդական առաջնության փոխչեմպիոն է դարձել Խորվաթիայի հավաքականը, իսկ լավագույն եռյակը եզրափակեց Թուրքիայի ընտրանին:
Առաջնության հանդիպումներն անցկացվել են Կարեն Դեմիրճյանի անվան մարզահամերգային համալիրում և Սպորտի կառավարման կենտրոնի ենթակայությամբ գործող «Միկա» մարզահամալիրում:
