Թուրքիային գոլ խփելուց հետո էմոցիաներն ուղղակի աննկարագրելի էին․ Մայքլ Ասիրյան
Հայաստանի Մ-19 հավաքականի և «Նոա» ՖԱ-ի հարձակվող Մայքլ Ասիրյանը Sportmedia.am-ի հետ զրույցում խոսել է ֆուտբոլային ճանապարհի, հավաքականում անցկացրած կարևոր պահերի, փորձառու խաղընկերներից ստացած դասերի և ապագայի նպատակների մասին։
-Մա՛յքլ, հիշո՞ւմ եք, թե ինչպես սկսվեցին Ձեր առաջին քայլերը ֆուտբոլում։
- Բակում շատ էի խաղում, գնդակի նկատմամբ սերս շատ մեծ էր, և օրվա մեծ մասն անցկացնում էի հենց ֆուտբոլ խաղալով։ Մայրս տեսավ, որ այդ սպորտաձևի հանդեպ իմ սերն իսկապես շատ մեծ է, և որոշեց, որ պետք է հաճախեմ ֆուտբոլի։ Առաջին քայլերս սկսել եմ տասը տարեկանից՝ «Փյունիկ» ֆուտբոլային ակադեմիայում։
-Իսկ այն ժամանակ պատկերացնո՞ւմ էիք, որ մի օր կդառնաք պրոֆեսիոնալ ֆուտբոլիտ։
- Այո՛։ Դեռ մանկուց երազում էի դառնալ պրոֆեսիոնալ ֆուտբոլիստ, և տարիքի հետ այդ երազանքը դարձավ նպատակ։ Ես իմ առջև դրել եմ շատ մեծ նպատակներ և անում եմ ամեն ինչ, որպեսզի իրագործեմ դրանք։
-Մի քանի ամիս առաջ Հայաստանի Մ-19 հավաքականի կազմում գոլ խփեցիք Թուրքիայի ընտրանուն։ Դրանից հետո ի՞նչ փոխվեց Ձեր կյանքում կամ ֆուտբոլային կարիերայում։
- Թուրքիային գոլ խփելուց հետո էմոցիաներն ուղղակի աննկարագրելի էին։ Բառերով չեմ կարող բացատրել դա։ Կարծում եմ՝ այդ գոլն ինձ տվեց փորձ, մեծ վստահություն և ավելի շատ աշխատելու մոտիվացիա։
-Ո՞րն է ամենակարևոր դասը, որը քաղել եք թիմի ավագ ու փորձառու խաղացողներից։
- Իրականում շատ բան եմ սովորել ավագ ու փորձառու ֆուտբոլիստներից՝ թե՛ դաշտում, թե՛ դաշտից դուրս։ Բայց կուզենայի առանձնացնել պրոֆեսիոնալիզմը, կարգապահությունը և մինչև վերջ պայքարելու, երբեք չհանձնվելու հոգեբանությունը։
-Ի՞նչն է ավելի կարևոր երիտասարդ ֆուտբոլիստի համար՝ սպասել իր «ոսկե պահին», թե՞ ամեն օր աննկատ «սև աշխատանք» անել։
- Կարծում եմ՝ ամեն օր «սև աշխատանք» անելը։ Աշխատասիրությունն ամենակարևորներից է ոչ միայն սպորտում, այլև բոլոր բնագավառներում։ Կարծում եմ՝ մեծ հավատը, կարգապահությունը և շատ-շատ աշխատանքը կտանեն դեպի այդ «ոսկե պահը»։
Բլից
-Գո՞լ, թե՞ հաղթական գոլային փոխանցում։
- Հաղթական գոլային փոխանցում։
-Ինքնաքննադատությո՞ւն, թե՞ ինքնավստահություն։
- Ինքնավստահություն։
-Լռությո՞ւն, թե՞ աղմկոտ հանդերձարան։
- Լռություն։
-Մարզչի գովասա՞նքը, թե՞ երկրպագուների վանկարկումը։
- Երկուսն էլ։ (Ժպտում է։ - խմբ.)։
-Մեկ բառով նկարագրեք Ձեր նպատակը գալիք մրցաշրջանում։
- Գոլահար։ (Ժպտում է։ - խմբ.)։
