Հայաստանի ձյուդոյի երիտասարդական հավաքականի մասնակիցները Լիտվայի Կաունաս քաղաքում մասնակցել են Եվրոպայի գավաթի մրցաշարին, որտեղ 25 երկրների 305 մարզիկ-մարզուհիներ են հանդես եկել:

60 կգ քաշային կարգում հանդես եկան Հայկ Դարբինյանը և Շավարշ Նահապետյանը: Վերջինս եզրափակչում առավելության է հասել Դարբինյանի նկատմամբ և ոսկե մեդալ նվաճել: Հայկ Դարբինյանը դարձել է արծաթե մեդալակիր: Նախքան եզրափակիչ դուրս գալը նրանք 4-ական հաղթանակ են տարել:



Հայաստանի մյուս ներկայացուցիչ 66 կգ քաշային Լյովա Սրապյանը հաղթել է առաջին երկու գոտեմարտերում, ապա, պարտվելով սփոփիչ գոտեմարտում, դուրս է մնացել հետագա պայքարից: 66 կգ քաշային Արշակ Բեկչյանը, տանելով երեք հաղթանակ, պարտվել է սփոփիչ գոտեմարտերում և նույնպես դուրս մնացել հետագա պայքարից: 73 կգ քաշային կարգը ներկայացնող Ժիրայր Համբարյանը հաղթել է առաջին գոտեմարտում, իսկ հաջորդում պարտվելով՝ դուրս մնաց հետագա պայքարից: