Լաշան անպարտելի մարզիկ է, բայց Լոս Անջելեսի Օլիմպիական խաղերի գերծանր քաշայինների ոսկին մերն է լինելու. Սամվել Գասպարյան

Հայաստանի ծանրամարտի ֆեդերացայի գլխավոր քարտուղար Սամվել Գասպարյանը Բաթումիում անցկացված Եվրոպայի առաջնության ավարտից հետո անդրադարձել է գերծանր քաշայինների պայքարին, ինչպես նաև վրացի լեգենդար ծանրորդ Լաշա Տալախաձեի հնարավոր վերադարձին մեծ սպորտ:

«Բազմիցս խոսել ենք Լաշայի հետ, բացի նրանից, որ գործընկերներ ենք, նաև ունենք շատ մտերիմ հարաբերություններ: Բազմիցս նրան ասել եմ, որ չակերտավոր իմ երազանքն է, որ դու վերադառնաս և Լալայանը վերադառնա իր նախկին մարզավիճակին, որովհետև ներկայում Լալայանը աշխարհում և Եվրոպայում չունի հավասարը: Մեր բոլորի երազանքն է, որ Լաշա Տալախաձեն վերադառնա և գերծանր քաշային կարգում մենք ականատես լինենք ուժեղ պայքարի, ոնց եղել է նախկինում՝ երեք, չորս կամ այս վերջին 10 տարիներում: Լաշան անպարտելի մարզիկ է, բայց ես վստահ եմ, որ Լոս Անջելեսի Օլիմպիական խաղերի գերծանր քաշայինների ոսկին մերն է լինելու»,- ասել է Սամվել Գասպարյանը:

Sportmedia.am-ը՝ Բաթումիից: