Laureus WSA․ Ալկարասը՝ տարվա մարզիկ, ՊՍԺ-ն՝ տարվա թիմ. Բոլոր անվանակարգերի հաղթողները
Laureus համաշխարհային մարզական մրցանակաբաշխության «Տարվա թիմ» անվանակարգում հաղթող է ճանաչվել ՊՍԺ-ն։ Ֆրանսիական ակումբը 2025 թվականին նվաճել է վեց տիտղոս, այդ թվում՝ պատմության մեջ առաջին անգամ հաղթել Չեմպիոնների լիգայում։
Փարիզյան ակումբն այս անվանակարգում առաջ է անցել Անգլիայի ֆուտբոլի կանանց հավաքականից, Բասկետբոլի ազգային ասոցիացիայի (NBA-ի) չեմպիոն «Օկլահոմա-Սիթիից», Ֆորմուլա-1-ի թիմային հաշվարկի հաղթող «Մաքլարենից», ինչպես նաև Հնդկաստանի կրիկետի կանանց հավաքականից և Եվրոպայի գոլֆի հավաքականից։
«Տարվա մարզիկ» անվանակարգում էլ հաղթող է ճանաչվել թենիսիստ Կառլոս Ալկարասը։
«Մեծ սաղավարտի» մրցաշարերի յոթակի հաղթողի հետ նույն կոչման համար պայքարում էին թենիսիստ Յանիկ Սիները, «Ոսկե գնդակի» նախորդ տարվա դափնեկիր Ուսման Դեմբելեն, թեթև ատլետ Արման Դյուպլանտիսը, մոտոարշավորդ Մարկ Մարկեսը և հեծանվորդ Տադեյ Պոգաչարը:
Ալկարասը մրցանակը ստացել է Իկեր Կասիլյասի և Լուիշ Ֆիգուի կողմից:
Լավագույն մարզուհի անվանակարգում հաղթել է թենիսիստուհի Արինա Սաբալենկան, լավագույն երիտասարդ մարզիկը Լամին Յամալն է։
Մյուս անվանակարգրերի հաղթողները՝
Տարվա հայտնություն՝ Լանդո Նորիս (Ֆորմուլա-1, Մեծ Բրիտանիա),
Տարվա լավագույն վերադարձ՝ Ռորի Մաքիլրոյ (Գոլֆ, Հյուսիսային Իռլանդիա)
Հաշմանդամություն ունեցող տարվա լավագույն մարզիկ՝ Գաբրիել Արաուժո (Լող, Բրազիլիա)
Տարվա լավագույն էքստրեմալ մարզիկ՝ Քլոե Քիմ (Սնոուբորդ, ԱՄՆ),
«Մարզական ներշնչանք»՝ Տոնի Կրոս (Ֆուտբոլ, Գերմանիա)
«Լեգենդար նվաճումների համար»՝ Նադյա Կոմանեչի (Մարմնամարզություն, Ռումինիա)
«Սպորտը հանուն բարության» մրցանակ՝ Fútbol Más (Կազմակերպություն)
Ըստ կանոնակարգի՝ Laureus-ի անվանակարգերի վերջնական ցուցակները ձևավորվում են ավելի քան 70 երկրների շուրջ 1000 մարզական լրատվամիջոցների քվեարկության արդյունքում, որից հետո Laureus համաշխարհային մարզական ակադեմիան ընտրում է հաղթողներին:
