Ինտերը հաղթեց Կալյարիին՝ մեկ քայլով ևս մոտենալով չեմպիոնությանը․ Մխիթարյանը մասնակցեց հանդիպմանը

Իտալիայի առաջնության 33-րդ տուրում «Ինտերը» ընդունել էր «Կալյարիին» ու հաղթեց 3։0 հաշվով:

Հանդիպման հաշիվը բացեց Մարկուս Թյուրամը՝ 52-րդ րոպեին։ 4 րոպե անց Նիկոլո Բարելան կրկնապատկեց տանտերերի առավելությունը, իսկ հիմնական ժամանակին ավելացրած 2-րդ րոպեին Պիոտր Զիելինսկին դրեց հանդիպման վերջակետը։

Հայաստանի ազգային հավաքականի լավագույն ռմբարկու Հենրիխ Մխիթարյանն ընդգրկված էր «Ինտերի» մեկնարկային կազմում ու փոխարինվեց 75-րդ րոպեին։

Այս հաղթանակից հետո միլանյան ակումբը 78 միավորով գլխավորում է մրցաշարային աղյուսակը՝ ունենալով 12 միավորի առավելություն 2-րդ տեղով ընթացող «Նապոլիից», որը 33-րդ տուրի հանդիպումը կանցկացնի ապրիլի 18-ին՝ ընդունելով «Լացիոյին»։ «Կալյարին» 33 միավորով 16-րդ տեղում է։