Ոչ մի խնջույք. Գրիզմանը պատմել է, թե ինչու է Սիմեոնեն արգելել Ատլետիկոյի ֆուտբոլիստներին տոնել հաղթանակը

Մադրիդի «Ատլետիկոյի» հարձակվող Անտուան Գրիզմանը Չեմպիոնների լիգայի քառորդ եզրափակչի՝ «Բարսելոնայի» դեմ պատասխան խաղից հետո (2:1) կիսվել է իր տպավորություններով ու նշել, որ թիմի գլխավոր մարզիչ Դիեգո Սիմեոնեն թույլ չի տվել երկար տոնել կատալոնացիների նկատմամբ տարած հաղթանակը:

«Տոնակատարությունը շատ կարճ տևեց, քանի որ Չոլոն (Սիմեոնեն) մեզ մի փոքր կանգնեցրեց՝ մտածելով Իսպանիայի գավաթի եզրափակիչի մասին (խմբ.՝ «Ռեալ Սոսյեդադի» դեմ որոշիչ հանդիպումը կկայանա շաբաթ օրը՝ ապրիլի 18-ին):

Ես կորցրեցի գնդակը երկրորդ գոլից առաջ: Զգում էի, որ պետք է ավելին անեի թիմին օգնելու համար և կարողացա գտնել Մարկոսին (խմբ․՝ Լյորենտեին) պաշտպանների թիկունքում:

Հունվարից սկսած ես հաճույք եմ ստանում, քանի որ ավելի շատ եմ խաղում: Իսկապես վայելում ես բարձրակարգ հանդիպումները: Սրանք այնպիսի երեկոներ են, որոնք ուզում ես ապրել: Որդիս մարզադաշտում էր: Ես երջանիկ եմ: Շատ հոգնած եմ և ուզում եմ մի լավ սառը գարեջուր խմել», — Գրիզմանի խոսքերը մեջբերում է EL Desmarque-ն:

Մրցաշարի կիսաեզրափակչում «Ատլետիկոն» կխաղա «Արսենալ» - «Սպորտինգ» զույգի հաղթողի հետ: