Չեմպիոնների լիգան վերջին հնարավորությունն է Արբելոայի համար․ Մասնագետը մրցաշրջանի ավարտից հետո կարող է լքել պաշտոնը

Մադրիդի «Ռեալի» գլխավոր մարզիչ Ալվարո Արբելոան կարող է լքել պաշտոնը ընթացիկ մրցաշրջանի ավարտից հետո, եթե թիմը անհաջող հանդես գա Չեմպիոնների լիգայում։ Այս մասին հայտնում է AS-ը։

Իսպանիայի առաջնության 30-րդ տուրում «Մալյորկայից» կրած պարտությունից հետո (1:2) պայքարը չեմպիոնական տիտղոսի համար չափազանց բարդ է թվում, և մարզչի՝ հաջորդ մրցաշրջանում պաշտոնում մնալը կախված է Չեմպիոնների լիգայում «արքայական» ակումբի ելույթներից:

«Մալյորկայից» կրած պարտությունը դարձավ 5-րդը՝ Արբելոայի գլխավորությամբ անցկացրած 18 խաղում։ Ակումբի ղեկավարութան կողմից բարձր է գնահատվում մասնագետի աշխատանքը հանդերձարանում, քանի որ նրան հաջողվել է կայունացնել մթնոլորտը այնպիսի առանցքային խաղացողների հետ, ինչպիսիք են Վինիսիուսը, Բելինգեմը և Վալվերդեն, սակայն վերջին պարտությունը սառեցրել է ամբողջ դրական դինամիկան։

Իսպանիայի առաջնության 30 տուրերից հետո Մադրիդի «Ռեալը» վաստակել է 69 միավոր և զբաղեցնում է մրցաշարային աղյուսակի երկրորդ հորիզոնականը՝ «Բարսելոնայից» հետ մնալով 7 միավորով։