«Լավ հարաբերությունների մեջ եմ Բելառուսի ազգային հավաքականի գլխավոր մարզչի հետ։ Ես նրան գիտեմ, թե՛ որպես մարդ, թե՛ որպես մարզիչ։ Վաղը լրացուցիչ շարժառիթ եմ ունենալու, որպեսզի ավելի լավ աշխատեմ ու խաղամ՝ քան սովորաբար էր»։
«Ինձ շատ դժվար է գնահատական տալ մարզավիճակիս։ Կարող եմ ասել, որ վերջին շրջանում կան արդյունքներ, գոլեր, փոխանցումներ և այն ինձ տալիս է վստահություն»։
«Թիմում չունենք ընկերական խաղ հասկացությունը։ Կա խաղ, որտեղ գալու են երկրպագուներ ու գալիս ենք այստեղ՝ ազգին հաղթանակ պարգևելու ու ուրախացնելու համար։ Հաղթանակն առանցքային է լինելու։ Ընկերական հանդիպումները տեղին են, բայց երբ հավաքականում ենք՝ առաջնայինը հաղթանակն է։ Թիմը երիտասարդացել է, մեծ ներուժ կա։ Հավաքականում կապ չունի, թե քանի տարեկան ես։ Երբ մտնում ես խաղադաշտ, բոլորդ հավասար եք։ Փորձում ենք դա ներշնչել երիտասարդներին։ Ոգևորությունը նույնն է, պատասխանատվությունը՝ նույնպես։ Ես ուզում եմ լավագույնը լինել իմ դիրքում, առավելագույն օգուտ տալ։ Բոլորը հավաքականում այդպես են մտածում»։
«Ինչ վերաբերում է Բելառուսի հավաքականին, կարող եմ ասել, որ ամուր հավաքական է ու ռեյտինգի տեսանկյունից՝ հեռու չենք։ Բելառուսն այն հավաքականն է, որի դեմ կարող ենք լավ խաղ ցուցադրել ու հաղթել»,-նշել է Տիկնիզյանը։
Հայաստան-Բելառուս ընկերական հանդիպումը կկայանա վաղը Վազգեն Սարգսյանի անվան «Հանրապետական» մարզադաշտում և կմեկնարկի 18։00-ին։
