Պաշտոնական. Անտուան Գրիզմանը հեռանում է Ատլետիկոյից ու Եվրոպայից

Մադրիդի «Ատլետիկոն» հայտարարել է, որ հարձկվող Անտուան Գրիզմանը մրցաշրջանի ավարտից հետո կլքի ակումբը: Ամռանը ֆրանսիացի հարձակվողը կմիանա ամերիկյան «Օռլանդո Սիթիին»:

«Ատլետիկոյի» թույլտվությամբ, Գրիզմանը մեկնել է ԱՄՆ՝ պայմանագիրը ստորագրելու: Ավելի վաղ հայտնի էր դարձել, որ ֆուտբոլիստն «Օռլանդոյի» հետ համաձայնեցրել է երկու տարվա պայմանագիր՝ տարեկան 10 միլիոն եվրո աշխատավարձով:

Գրիզմանն «Ատլետիկո» էր տեղափոխվել 2014 թվականին. 2019-ից 2022 թվականներին Անտուանը հանդես է եկել «Բարսելոնայում»: Ֆրանսիացին մադրիդյան ակումբի պատմության լավագույն ռմբարկուն է՝ խփած 211 գոլով: «Ատլետիկոյի» կազմում 35-ամյա հարձակվողը նվաճել է Իսպանիայի սուպերգավաթը, Եվրոպա լիգան և Եվրոպայի սուպերգավաթը:

Ընթացիկ մրցաշրջանում «Ատլետիկոն» արդեն հասել է Իսպանիայի գավաթի եզրափակիչ և Չեմպիոնների լիգայի քառորդ եզրափակիչ: Լա լիգայում թիմը 16 միավորով հետ է առաջատար «Բարսելոնայից»: