10 տարվա բանակցություններից հետո Միլուոլը 999 տարով վարձակալել է իր տնային մարզադաշտը

Անգլիական «Միլուոլը» 999 տարի ժամկետով վարձակալել է իր տնային՝ «Նյու Դեն» մարզադաշտը։

Սա հնարավոր է դարձել Լոնդոնի Լուիշեմ շրջանի քաղաքային խորհրդի հետ բոլոր համաձայնագրերի ձևակերպումն ավարտելուց հետո։ Ակումբը ստացել է մարզադաշտի և հարակից տարածքների վարձակալության նոր պայմանագիր՝ 999 տարի ժամկետով։

Այս համաձայնագիրը ամրագրում է ակումբի երկարաժամկետ ներկայությունը պատմական մարզադաշտում։ «Միլուոլում» նախատեսում են արդիականացնել ենթակառուցվածքները և ընդլայնել մարզադաշտի օգտագործումը նաև ոչ խաղային օրերին։

Կողմերի միջև բանակցությունները տևել են ավելի քան 10 տարի, իսկ եզրափակիչ փուլը՝ մոտ 18 ամիս։ Ակումբի նախագահ Ջեյմս Բերիլսոնը պայմանագրի ստորագրումը որակել է որպես «առանցքային պահ» «Միլուոլի» ապագայի համար։

Հավելենք, որ «Միլուոլը» Չեմպիոնշիպի ընթացիկ մրցաշրջանում վաստակած 68 միավորով զբաղեցնում է մրցաշարային աղյուսակի 4-րդ հորիզոնականը։