Հոլանդը երջանիկ է Ման․ Սիթիում. Նորվեգացու գործակալը հերքել է Բարսելոնա տեղափոխվելու մասին լուրերը

Էրլինգ Հոլանդի գործակալ Ռաֆայելա Պիմենտան արձագանքել է «Բարսելոնայի» նախագահի թեկնածու Վիկտոր Ֆոնտի խոսքերին՝ նորվեգացու տրանսֆերի շուրջ «Մանչեսթեր Սիթիի» հետ տարվող բանակցությունների վերաբերյալ։

«Մենք մեծ հարգանքով ու հիացմունքով ենք վերաբերվում «Բարսելոնային», սակայն հնարավոր տեղափոխության թեմայով ընդհանրապես ոչ մի շփում չի եղել։ Ֆուտբոլիստը մի քանի ամիս առաջ երկարաձգել է պայմանագիրը և երջանիկ է «Մանչեսթեր Սիթիում»։

Նրա մոտ ամեն ինչ լավ է ընթանում, և մենք տրանսֆերի համատեքստում քննարկելու ոչինչ չունենք, քանի դեռ «Սիթիում» ամեն ինչ այդքան հիանալի է»,- ասել է Պիմենտան La Sexta-ին տված հարցազրույցում։

Ընթացիկ մրցաշրջանում Էրլինգ Հոլանդը «քաղաքաբնակների» կազմում, բոլոր մրցաշարերում, մասնակցել է 40 հանդիպման՝ դառնալով 29 գոլի ու 1 գոլային փոխանցման հեղինակ։