Ռեալի հանդերձարանն անկառավարելի է․ Գլուխ չէին հանում ոչ Անչելոտտին, ոչ Ալոնսոն, հիմա էլ՝ Արբելոան․ Կարենյո

Cadena SER-ի լրագրող Մանու Կարենյոն «Ռեալի» ֆուտբոլիստներին անվանել է «անկառավարելի»։

«Ինչպիսի՞ խնդրի առաջ է կանգնած Արբելոան ուրբաթ օրը «Բալաիդոսում» («Սելտա Վիգոյի» մարզադաշտը) կայանալիք խաղից առաջ՝ որակազրկումներ, վնասվածքներ... Եվ ինչպիսի՜ մթնոլորտ է կրկին տիրում հանդերձարանում։ Թվում էր, թե ամբողջ խնդիրը Խաբի Ալոնսոյի մեջ էր, բայց տպավորություն է ստեղծվում, որ այս հանդերձարանն անկառավարելի է։ Դրա հետ չէին կարողանում գլուխ հանել ոչ Անչելոտտին, ոչ Խաբի Ալոնսոն, իսկ հիմա էլ՝ Արբելոան։Ես կասեի, որ նույնիսկ նախագահը։

Նրանք անկառավարելի են։ Մի մարզիչը նրանց դուր չի գալիս, որովհետև չափազանց շատ է ճնշում գործադրում, մյուսը՝ չափազանց երկար տեսանյութերի պատճառով, երրորդը՝ որովհետև չափազանց մեղմ է... Իսկ Արբելոան՝ որովհետև նրանք համարում են, որ նա բավարար չափով լավը չէ։

Գուցե պետք չէ մարզչին թողնել մի անկառավարելի հանդերձարանի հետ, որը լավագույն ժամանակները չի ապրում և մեզ գեղեցիկ ֆուտբոլային երեկոներ չի պարգևում, հատկապես՝ «Ռեալի» երկրպագուներին», – ասել է Կարենյոն։