Խամես Սանթոսը վերադարձավ Փյունիկ

«Փյունիկ» է վերադարձել բրազիլացի եզրային պաշտպան Խամես Սանթոսը:

30-ամյա ֆուտբոլիստը նախկինում հանդես է եկել բրազիլական «Ինտեր դե Լագեսում», «Բրագանտինոյում», «Սամպայո Կորեայում» և «Կամպինենսեում»։ 2019 թվականի օգոստոսին Խամեսը տեղափոխվել է «Արարատ», իսկ հաջորդ մրցաշրջանն անցկացրել է «Ուրարտուում», ինչից հետո ելույթները շարունակել է «Ալաշկերտում»։ Վերջինիս կազմում նա մասնակցել է Կոնֆերենցիաների լիգայի 2021/22 թթ․ խաղարկության խմբային փուլի 5 հանդիպումների։

2023 թվականի հունվարին բրազիլացի ֆուտբոլիստը տեղափոխվել է «Փյունիկ»։ 2023/24 մրցաշրջանում նա «Փյունիկի» հետ նվաճել է Հայաստանի չեմպիոնի կոչումը։

Ընդհանուր առմամբ, Խամես Սանթոսը «Փյունիկում» անցկացրել է 72 հանդիպում, որոնցում դարձել է 8 գոլի և 9 գոլային փոխանցման հեղինակ։

Նախորդ տարվա հունվարին Խամեսը տեղափոխվել է Երևանի «Նոա», որի հետ դարձել է Հայաստանի 2024/25 մրցաշրջանի չեմպիոն ու գավաթակիր։

Սանթոսի նախորդ թիմը Չարենցավանի «Վանն» էր, որտեղ հանդես էր գալիս 2025 թվականի օգոստոսից։ Ընթացիկ մրցաշարջանի առաջին հատվածում նա «Վանի» կազմում մասնակցել է 16 հանդիպման և կատարել մեկ գոլային փոխանցում։

«Փյունիկը» բարի վերադարձ և հաջող մրցելույթներ է մաղթել ֆուտբոլիստին։