ՖԻՖԱ-ն տուգանել է ՀՖՖ-ին՝ Պորտուգալիայի և Իռլանդիայի հետ խաղերի ժամանակ տեղի ունեցած խախտումների համար

Ֆուտբոլի միջազգային ֆեդերացիայի (ՖԻՖԱ) Կարգապահական կոմիտեն հրապարակել է 2026 թվականի Աշխարհի առաջնության որակավորման խաղերին առնչվող կարգապահական որոշումները, որոնց թվում է նաև Հայաստանի Ֆուտբոլի ֆեդերացիայի (ՀՖՖ) նկատմամբ կիրառված տուգանքը։

ՖԻՖԱ-ն որոշել է տուգանել ՀՖՖ-ին ընդհանուր 13,000 շվեյցարական ֆրանկով՝ սեպտեմբերին կայացած երկու տնային հանդիպումների ընթացքում արձանագրված խախտումների համար։

Ըստ պաշտոնական հրապարակման՝ Հայաստան – Պորտուգալիա խաղի (2025թ. սեպտեմբերի 6) ընթացքում արձանագրվել են՝ թիմային անպարկեշտ վարքագիծ, կարգուկանոնի ու անվտանգության խախտումներ, խաղադաշտ ներխուժման կամ փորձի դեպքեր, խուլիգանական դրսևորումներ, այդ թվում՝ ճայթրուկների օգտագործում։

Այս խախտումների համար ՀՖՖ-ին նշանակվել է 12,000 շվեյցարական ֆրանկ տուգանք՝ ՖԻՖԱ-ի կարգապահական կանոնակարգի 17-րդ հոդվածի և դրա ենթակետերի հիման վրա:

Հայաստան – Իռլանդիա խաղի (սեպտեմբերի 9) ընթացքում արձանագրված փոքր խախտումների համար ՀՖՖ-ին տրվել է լրացուցիչ 1,000 շվեյցարական ֆրանկ տուգանք։